Galeguizar Galicia TV

A lingua galega volve ser visible a través dunha canle de televisión.

No mes de decembro falabamos de Lingua Galega TV, un portal de televisión por internet dedicado integramente á divulgación, promoción e coñecemento da lingua galega.

Desta volta os colectivos que forman parte de galeguizargalicia.com acaban de pór en marcha a canle galeguizargalicia.tv, a través da que difunden os vídeos das súas actividades a prol da lingua.

O Foro Enrique Peinador, a Asociación Álvaro das Casas, a Asociación de Amigos do Couto Mixto, a Fundación Lois Peña Novo, a Irmandade Xurídica Galega e a Asociación de Funcionarios para a Normalización Lingüística, puxeron en marcha a canle :

Galeguizargalicia.tvO obxectivo desta nova canle de TV é  darlle maior difusión a todas as iniciativas relacionadas coa lingua galega e coa súa proxección social. Rretransmitirá en directo os actos públicos programados, así como mesas redondas, reportaxes e mensaxes publicitarias. E ademais recuperará aqueles fitos históricos nos que participou dende os seus inicios e que serviron para visibilizar a lingua galega nos diferentes eidos da vida colectiva dos galegos e galegas.

Entre eles atopamos algún que ten moito que ver co noso concello. Poñemos aquí o vídeo gravado en Redondela co gallo da homenaxe a Ramón Cabanillas en xuño de 1997.

Seguimento ou *seguemento

Estes días pasados, por mor da folga xeral convocada, e tamén a raíz da análise doutras convocatorias, escoitamos e lemos en diversos titulares dos medios de comunicación O *seguemento da folga…. E este é un erro relativamente frecuente que deberíamos evitar.

O certo é que o verbo SEGUIR, segundo as Normas ortográficas e morfolóxicas do idioma galego (RAG – ILGA, 2003), igual que acontece noutros verbos da 3ª conxugación como SERVIR, FERIR, MENTIR ou SENTIR, ten alternancia vocálica, isto é: nalgunhas formas verbais hai un cambio na vogal da raíz do verbo. Así dicimos eu sigo, pero ti segues, el segue ou eles seguen (con vogal aberta), ou nós seguimos e vós seguides, con vogal pechada. Porén a alternancia vocálica nestes verbos só se dá no presente de indicativo (que acabamos de pór), no presente de subxuntivo – SIGA – (todo o paradigma con i), e no imperativo – SIGUE, SEGUIDE -.

O substantivo proposto, SEGUIMENTO (que expresa a acción e o efecto de seguir), é derivado do verbo seguir e mantén, polo tanto, a mesma raíz ca este.

Témoslle LEI

A Facultade de Dereito da Universidade de Santiago de Compostela vén de promover unha nova campaña de normalización lingüística. Baixo o lema Témoslle LEI,  as Comisións de Normalización Lingüística xunto co Servizo de Normalización Lingüística da Universidade elaboraron uns materiais que servirán de soporte a esta campaña, coa que pretenden estender o uso da lingua galega no ámbito do dereito e as leis.

Baixo a definición de cabeceira “TERLLE LEI (a algo ou alguén): gardar fidelidade, sentir simpatía ou terlle un grande aprezo“, pretenden incrementar e mellorar o uso do galego na docencia, para acadar en tres cursos o 30% das horas de clase na nosa lingua.

Para iso elaboraron un PLAN que inclúe as máis diversas actividades (obradoiros, revistas, vocabularios, concursos ou novos materiais docentes), co obxectivo final de mellorar as competencias e actitudes lingüísticas entre a comunidade universitaria e, por extensión, ao ámbito da xustiza.

Entre os materiais atópase un folleto explicativo da campaña, un CD que inclúe lexislación en lingua galega, lexislación lingüística e recursos lingüísticos, e un decálogo para ser lingüísticamente sustentable. (Pódense ver na ligazón máis arriba).

Témoslle Lei- Os profesionais opinan from temosllelei on Vimeo.

No vídeo da campaña varios profesionais do mundo da xustiza e da administración pública, así como profesores do centro opinan sobre a utilización do galego neste eido e animan a utilizalo en maior grao. Participan: Carlos Varela (fiscal xeral de Galicia), Luís Villares (xuíz da Fonsagrada), Paz Filgueira (maxistrada do Social en Santiago), Evaristo Nogueira (decano do Colexio de Avogados de Santiago), Xaquín Monteagudo (secretario do Concello de Outes) e os profesores da Facultade Antonia Nieto Alonso (coordinadora da Comisión de Normalización Lingüística) e José A. Gómez Segade (catedrático de Dereito Mercantil).

Axóuxeres en Redondela

A Secretaría Xeral de Política Lingüística programou para este ano AXÓUXERES en Redondela.

Trátase dun programa de dinamización lingüística dirixido a bebés de 0 a 3 anos que busca favorecer a incorporación do galego á comunicación entre as familias e os bebés, utilizando para iso o xogo, a música e a experiencia sensorial.

O obxectivo deste programa é axudar a que os pais e as nais contribúan á transmisión da lingua e, á vez, obteñan ideas para xogar na casa, prolongando no fogar as propias actividades.  Ademais a iniciativa homenaxeará aos avós, en recoñecemento polo seu labor de coidado, educación e transmisión da lingua aos máis pequenos.

A programación no noso concello inclúe:

ENCONTROS DOS AXÓUXERES

Domingo, 20 de febreiro de 2011, ás 12.00 h, na Casa da Cultura de Redondela.
Para asistir xa se pode  facer a inscrición no teléfono 686160879.

OBRADOIROS DOS AXÓUXERES

Venres, 25 de febreiro de 2011, ás 17.00 e 19.00 horas, na Casa da Cultura.
Sábado, 26 de febreiro de 2011, ás 12.00 horas, na Casa da Cultura.
A inscrición comezará uns días antes dos mesmos, no teléfono 630230338.