Arquivo da categoría: Sen clasificar

Arrolos de salitre, nos Venres Cativos de Apego

O vindeiro venres 13 de abril teremos connosco a Xabier Díaz e Guillerme Fernández para cantárno-los seus “Arrolos de salitre”. Un obradoiro para que as familias aprendan algunhas melodías tradicionais galegas.

Desta volta, haberá límite de asistencia (até 25 familias por sesión). Polo tanto, precisamos que enviedes un correo cos datos da crianza (cunha idade comprendida entre os 0 e 3 anos) e das persoas que irán canda el (máximo 2 adultos) ó enderezo electrónico normalizacion@redondela.gal As prazas encheranse por rigorosa orde de solicitude.

A data límite de inscrición remata o mércores 11 de abril.

As familias participantes recibirán, unha vez confirmada a inscrición, as letras e a música dos arrolos para que as coñezan de antemán e as canten con Xabier e Guillerme.

Haberá dúas sesións: 17:30 e 18:30h.

A actividade desenvolverase no auditorio do Multiúsos da Xunqueira,

Este concerto de arrolos é outra actividade incluída nos Venres Cativos, que forma parte do proxecto Apego co ánimo de garanti-la transmisión interxeracional do galego ou fomenta-la súa adquisición nas idades máis temperás.

A entrada é de balde.

Despedida do Vindel

O Concello de Redondela, dende o seu Servizo de Normalización Lingüística, fará a súa particular despedida do Pergamiño Vindel.

Para isto, contaremos con Camiño Noia (catedrática emérita da Universidade de Vigo), quen nos falará do contexto en que se produce a lírica medieval e a relevancia da lingua galega na Europa medieval; e Paulina Ceremuzynska, especialista en música medieval e quen nos interpretará ó vivo as cantigas de Martin Codax.

O acto será o mércores 21 de marzo ás 19:30 na Sala de Exposicións do Multiúsos da Xunqueira.

Agardámosvos

Concerto de Magín Blanco (22 de marzo)

Os Venres Cativos continúan coas súas actividades.

Desta volta, o venres final de mes cae en festivo. Mudamos de data para o xoves 22 de marzo ás 18h no Multiúsos da Xunqueira.

Desta volta contaremos co concerto didáctico “Letras e notas” de Magín Blanco. Unha boa oportunidade para gozar coa música e aprender.

Alameda Rosalía de Castro

O pasado 25 de xaneiro o Pleno do Concello de Redondela aprobou por unanimidade denomina-la alameda de Chapela como Alameda Rosalía de Castro.

A iniciativa xurdiu dende o SNL, órgano dependente de Alcaldía, e respondeu á necesidade de homenaxear nun lugar público a unha das figuras máis senlleiras da cultura e da historia galegas.

Prevese que en xullo deste mesmo 2018 se instale unha escultura dedicada  a Rosalía de Castro e se realice algunha outra intervención na zona.