Arquivo da categoría: Redondela

O NOSO VENDE, premiados

Comezou a galeguización do comercio redondelán, de vagar pero con forza.
Parabéns a todos os establecementos premiados:

1º premio: VIMAR

2º premio: CANDIL DECORACIÓNS

3º premio: MOLIÈRE LIBRERÍA-PAPELERÍA

Os restantes establecementos inscritos que cumpriron as bases da convocatoria e obtiveron premio tamén son: BURBULLA, CACHARELA ARTESANÍA, TU-DEPORTE.COM, SCARPA REDOPIEL, S.L., MENIÑOS e CASALARANXA.

E xa comezaron tamén as cuñas publicitarias en Radio Redondela.

Vimar by Servizo Redondela

O NOSO VENDE from SNL Redondela on Vimeo.

Premiados no concurso de escaparates O NOSO VENDE

O Servizo de Normalización Lingüística do Concello de Redondela, en colaboración coa Asociación de Empresarios de Redondela, vén de resolver o concurso de decoración especial de Nadal para o comercio redondelán.

Este concurso para promover o comercio local incide na necesidade de facer unha promoción efectiva da lingua galega neste ámbito económico, e serve de lanzamento do programa de dinamización lingüística do comercio que se desenvolverá durante todo o 2012. O NOSO VENDE! é o nome desta campaña que inicia a súa andadura con este concurso de escaparates nos comercios redondeláns, para incidir na promoción dos seus produtos, na proximidade e no bo servizo a través do uso da nosa lingua.

Foron 9 os establecementos inscritos que cumpriron as bases da convocatoria, é dicir, que amais de ter instalada a súa decoración especial, na preparación do seu escaparate incluíron algún lema específico en lingua galega ou teñen a súa rotulación na nosa lingua. Todos eles contarán con cuñas publicitarias en Radio Redondela, que serán supervisadas polo Servizo de Normalización Lingüística, e que poderán emitirse durante o ano 2012 nas datas da súa elección.

Os establecementos premiados  son os seguintes:

 • 1º premio: 150 € en metálico e un paquete de 300 € en cuñas na Radio Municipal de Redondela (75 cuñas + ata 3 gravacións). Gañador: VIMAR.

2º premio: paquete de 200 € en cuñas na Radio Municipal de Redondela (60 cuñas + ata 2 gravacións). Gañador: CANDIL DECORACIÓN.

 • 3º premio: paquete de 100€ en cuñas na Radio Municipal de Redondela (30 cuñas + 1 gravación). Gañador: LIBRERÍA MOLIÈRE.

 Os restantes participantes que cumpriron as bases, recibirán 60 € (15 cuñas e 1 gravación) de publicidade en Radio Redondela para o ano 2012, nas datas da súa elección.

Con este concurso o SNL pretende animar a utilizar a lingua galega como idioma preferente no comercio, demostrando que é útil e que en galego pódese vender máis e mellor.

Concursos para galeguizar o Nadal

O Servizo de Normalización Lingüística e mais a Asociación de Empresarios de Redondela, poñen en marcha dúas campañas de dinamización e normalización lingüística centradas na época de Nadal, orientadas a dous sectores estratéxicos da actividade económica: a hostalaría e o comercio.

Continuando coa campaña de normalización lingüística na hostalaría iniciada en 2011, A LINGUA MÁIS SABOROSA, en galego da mañá á noite, convídase novamente aos establecementos hostaleiros a utilizar a lingua galega nas súas comunicacións, publicidade, cartas de viños e comidas, e menús ou ofertas especiais de Nadal. E para contribuír a establecer ese hábito convócase un CONCURSO DE ESCAPARATES, que pretende facer promoción dos establecementos hostaleiros redondeláns e promover o uso da lingua galega no sector.

Para participar no mesmo deberán preparar unha decoración especial nos seus escaparates que sirva de promoción de produtos tipicamente galegos, onde se recoñeza e identifique a nosa cultura. Con este fin poderán enfeitar as súas vidreiras ou expositores con libros, fotografías, pinturas, instrumentos musicais, produtos alimenticios ou vinícolas, apeiros de labranza ou calquera outro aparello que achegue información etnográfica ou patrimonial do noso país. A inscrición deberá formalizarse a través do enderezo electrónico aer@empresasredondela.com, indicando nome do establecemento, nome da persoa responsable e teléfono de contacto, e especificando no asunto “concurso escaparates hostalaría”. O prazo remata o día 16 de decembro de 2011.

Ademais, iníciase un proxecto de promoción e galeguización do comercio local a través da lingua galega. O NOSO VENDE! é o nome do programa de dinamización que inicia a súa andaina coa convocatoria dun concurso de escaparates nos comercios redondeláns, e que continuará con outras actividades en 2012, para incidir na promoción dos seus produtos a través do uso da nosa lingua.

Na preparación do seu escaparate os comercios participantes deberán incluír algún lema específico para motivar a súa clientela a que merque os seus produtos, e implica que os establecementos poñerán a súa publicidade, os rótulos e os prezos, así como os carteis de descontos, ofertas especiais ou bos desexos para as festas, tanto dentro coma fóra do local, en lingua galega. A inscrición deberá formalizarse a través do enderezo electrónico aer@empresasredondela.com, indicando no asunto “Concurso O NOSO VENDE!”, e especificando o nome do establecemento, o nome da persoa responsable e teléfono de contacto. O prazoremata o día 16 de decembro de 2011.

Tanto nunha modadlidade coma na outra, os establecementos deberán ter instalada a súa decoración entre o 19 de decembro e o 5 de xaneiro, data na que recibirán o premio, que se dará a coñecer o día 3. Os establecementos gañadores serán visitados e fotografados por persoal da Asociación de Empresarios e do Concello de Redondela entre o 19 e o 30 de decembro.

Os premios, para ambas modalidades, consistirán en 150 € para o primeiro clasificado e mais un paquete de 240 € (20 días) de publicidade en Radio Redondela para o ano 2012. Para o 2º e 3º premios 120 € (15 días) de publicidade en Radio Redondela; e para todos os participantes, 60 € (5 días) de publicidade en Radio Redondela, nas datas da súa elección.

Con estes dous concursos o SNL pretende animar a utilizar a lingua galega como idioma preferente na hostalaría e no comercio, demostrando que é útil e que en galego pódese vender máis e mellor. Ademais, contribuirá a promocionar estes dous ámbitos do sector dos servizos, necesitados de estímulo e impulso.

Para levar adiante esta promoción contarán coa colaboración do SNL que corrixirá, traducirá ou asesorará as súas propostas.

 Pódense consultar as bases nestas ligazóns:

BASES CONCURSO HOSTALARÍA

BASES CONCURSO COMERCIO

Castelao en Saxamonde

O Centro Cultural Chan das Pipas de Saxamonde acolle dende o 28 de setembro e ata o 23 de outubro a exposición “Castelao e nós, 125 aniversario”.

Trátase dun proxecto divulgativo da obra gráfica de Alfonso Daniel Rodríguez Castelao ideada no ano 2000 pola AS-PG (Asociación Socio-Pedagóxica Galega), e patrocinada pola Fundación Castelao e diferentes concellos, entre os que se atopa o Concello de Redondela. Neste ano 2011, no que se celebra o 125 aniversario do nacemento do artista, escritor e político galego (Rianxo, 30 de xaneiro de 1886), o Servizo de Normalización Lingüística do Concello de Redondela promove esta exposición itinerante para achegar a figura e obra deste persoeiro da nosa cultura á cidadanía redondelá.

A mostra, titulada daquela “Castelao e nós. Unha viaxe pola súa obra”, vén agora mostrar a vixencia do pensamento e da obra do artista rianxeiro, e achega á poboación redondelá unha selección de debuxos e textos significativos que mostran a súa grandeza como creador plástico, pensador e político.

Baixo o título “Castelao e nós, 125 aniversario”, a mostra inclúe debuxos dos álbums Nós (1931), Cousas da vida (1924-1925), Galicia mártir e Atila en Galicia (1937), e textos tirados do seu libro de ensaio político Sempre en Galiza (1944), nos que reflexiona sobre a economía e a sociedade, a emigración, a lingua, as institucións, a guerra do 36 ou o nacionalismo.

A exposición, que estivo anteriormente no Piñeiral do Crego de Chapela, no Centro Cultural de Vilar de Infesta e no Multiusos da Xunqueira de Redondela, achégase agora a Saxamonde onde se poderá visitar ata o 23 de outubro.

O Centro Cultural Chan das Pipas e o SNL animan a todos os veciños e veciñas a visitala no propio centro, a partir das 17.00 h en días laborables, e dende as 12.00 h nas fins de semana.