Arquivo da categoría: Recursos

Centenario de Cunqueiro

Con motivo de celebrarse neste 2011 o centenario do nacemento de Álvaro Cunqueiro, o Consello da Cultura Galega organiza unha serie de eventos conmemorativos desta efeméride.

Entre elas vén de ser presentada a iniciativa “A cociña galega con Cunqueiro“, que quere difundir a obra literaria e gastronómica do escritor mindoniense e o acervo gastronómico do país, en colaboración cos restaurantes de Galicia.

O obxectivo é levar os pratos máis queridos do principal escritor gastronómico de Galicia ás cociñas dos restaurantes, e recuperar así a rica tradición gastronómica galega, ao tempo que os establecementos se converten nun privilexiado espazo de difusión cultural. Deste xeito xúntanse cociñeiros de Galicia tradicionais e contemporáneos que, cada un dende o seu diferente estilo, renderán unha homenaxe ao escritor que dignificou a gastronomía de Galicia e lle deu carta de identidade no mundo. O proxecto incluirá a distribución de 10.000 exemplares dunha antoloxía literaria e gastronómica de Don Álvaro Cunqueiro entre os clientes dos restaurantes de Galicia.

Aqueles restaurantes que queiran participar poden dirixirse ao responsable do proxecto no Consello da Cultura Galega (Manuel Gago), a través deste correo electrónico director@culturagalega.org,  ou ben chamar ao teléfono 981957219 (luns a venres, de 09 a 15 h).

Tamén poden solicitar información neste Servizo de Normalización Lingüística no teléfono 986402842 ou no correo electrónico normalizacion@redondela.info

Guía de internet en galego: os meus favoritos

Os concellos de Carballo, Malpica de Bergantiños, Ponteceso e Zas veñen de difundir a guía de internet Os meus favoritos, coa finalidade de espallar a información na rede en lingua galega, que abrangue os recursos e a divulgación que se produce na rede en eidos como a música, o deporte, ou a creación artística, e inclúe tamén o uso en galego dos sistemas operativos, paquetes ofimáticos, navegadores ou redes sociais.
Os servizos de normalización lingüística (SNL) destes concellos promoveron e editaron esta guía, un catálogo que recolle preto de 200 enderezos de sitios web en galego de ámbitos tan diversos como a banda deseñada, o deporte, o audiovisual, a información cultural, a mocidade, as redes sociais ou os xogos.

Os obxectivos deste proxecto son facilitar o descubrimento e o coñecemento do ciberespazo en galego, vencellar a lingua galega con novos e modernos espazos de uso,  e contribuír á difusión da información de todo tipo na nosa lingua.

Baixo o epígrafe O galego precisa de internet e internet precisa do galego, divúlgase esta guía que se pode descargar de balde en PDF.

Lingua minoritaria

Este é o título do primeiro dos vídeos que vou mostrar, pertencente á serie XENÉRICOS EN MONODOSE, que dende a USC fixeron M. Núñez Singala e máis M. Bermúdez para reflexionar sobre a situación da nosa lingua e para sentírmonos partícipes do seu futuro.

É coma un tratamento en pequenas doses que pretende mellorar os síntomas da nosa lingua e conseguir a súa normalización.

Aquí vos deixo o 1º: LINGUA MINORITARIA

Recursos enerxéticos en galego

A normalización da lingua pasa por estar visible en todos os ámbitos de uso e campos do saber.

Na sociedade actual, as novas tecnoloxías e o desenvolvemento sostible son pezas fundamentais nas que a nosa lingua comeza tamén a ter visibilidade.

O INEGA, Instituto Enerxético de Galicia, promoveu durante este mes de marzo programas de eficiencia enerxética, que se poden consultar na súa web. E, alén diso, editou un xogo de aforro enerxético en rede protagonizado por SUPER E, que intenta estimular a utilización responsable dos recursos e enerxías no seo das familias, que se complementa con consellos para aforrar enerxía de xeito eficiente, e na nosa lingua.

E estes días tamén saíu á luz un xornal especializado en responsabilidade social e sostibilidade: falaRSE.

Este novo xornal dixital pretende ser un referente na información sobre a responsabilidade social das empresas e o desenvolvemento sustentábel, tanto no sector público coma no privado.

Velaquí temos unha nova ferramenta na rede e en galego, que achega a nosa lingua ao mundo sustentábel que queremos.