Arquivo da categoría: Novas

Dicionario Moderno Inglés – Galego

Hoxe presentamos unha interesante novidade editorial destes días: o DICIONARIO MODERNO INGLÉS-GALEGO.

Editado por 2.0 Editora é da autoría do profesor Alberto Álvarez Lugrís, profesor de tradución do inglés para o galego na Facultade de Filoloxía e Tradución da Universidade de Vigo.

Este dicionario é o resultado dun proxecto de investigación do Seminario de Lingüística Informática da Universidade de Vigo, que tivo unha primeira edición dixital en 2005,  e está concibido como unha ferramenta totalmente práctica que abrangue o vocabulario de uso frecuente na lingua inglesa e as súas correspondencias en galego.
O DMIG está feito a partir do Corpus Lingüístico da Universidade de Vigo (CLUVI, de acceso libre en http://sli.uvigo.es/CLUVI), composto por máis de 20 millóns de palabras,  que recolle ademais textos orixinais e as súas correspondentes traducións, e as equivalencias entre as palabras dos textos ingleses e as dos textos galegos, seleccionadas en función da súa frecuencia de uso. Compleméntase con exemplos das distintas acepcións con citas tiradas do corpus CLUVI. Deste xeito recolle os usos reais da lingua, empregados nas traducións profesionais de textos de distintos xéneros.

 

Trátase do primeiro gran dicionario bilingüe inglés-galego, a través do cal nos poderemos achegar ao inglés dende a nosa lingua, sen intermediarias.

 

Sermos Galiza, xa nos quioscos

Hoxe hai unha boa nova nos quioscos para a nosa lingua: SERMOS GALIZA.

Dende hoxe, os venres de cada semana Sermos Galiza chegará aos quioscos “co obxectivo de informar, fornecer claves para a interpretación, entreter e ofrecer novas propostas de lectura e ocio”.

O que presentabamos hai unhas semanas toma agora corpo en papel impreso para achegarse a toda a xente que demanda información na nosa lingua.

Neste primeiro número inclúe un amplo informe sobre a política municipal, abórdanse temas como a nova lei que regula as condicións das empregadas do fogar, a reforma no currículo de Educación para a Cidadanía e o último episodio da batalla da viciñanza de Quilmas contra a multinacional Stolt Sea Farm por lles contaminar as terras. Ademais achéganse ás últimas novidades sobre NGB até o impacto da crise nos fogares de Galiza.

Na sección de cultura ofrece información sobrea crise das artes escénicas e inclúe entrevistas co escritor Agustín Fernández Paz e Ignacio Vilar, o director de Vilamor, entre outras.

Alén diso, aposta por propostas novidosas como a sección de información infantil, a de deseño, viaxes ou agroconsumo.

Vaia, que hai moitos ingredientes para nos interesar nesta publicación.

Parabéns e longa vida!

KUBUS, a primeira revista de fútbol en galego

Malia a crise e todos os problemas de financiamento destes tempos, a Rede segue a sorprendernos e está máis vizosa ca nunca,  mesmo en actividades de promoción da nosa lingua, para a que parece que noutros ámbitos non hai espazos.

Logo das últimas novidades de prensa galega na internet, agora chéganos a primeira revista en lingua galega sobre fútbol: KUBUS.

KUBUS é o nome dunha nova web en lingua galega dedicada ao fútbol que tamén edita unha revista complementaria en papel, dirixida por Rubén González e Javi Paz, xunto a unha manchea de colaboradores e seareiros deste deporte.

Tal como manifestan na presentación do proxecto, queren levar adiante “o soño de tentar encher o baleiro que presenta o periodismo relacionado co deporte rei en lingua galega. A intención final de que mensualmente preto de cen páxinas con contido futbolístico en lingua galega pasen a imprenta. … A persecución de crear o que nos agradaría poder atopar no mercado, pero que ata data ninguén se arriscou a levar adiante. Contar as historias que nos encantaría ter escoitado de cativos“.

Este proxecto permite, ademais, a recadación de apoios (via Verkami), onde ten aberta unha iniciativa concreta para obter fondos a través do apoio de moitos seareiros en liña.

Faite seareiro!

 

A lingua a reflexión

Cómpren reflexións acerca da nosa lingua?

A lingua a reflexión é o título dun interesante documental realizado por Xosé Bocixa, que mostra as reflexións de dez persoeiros sobre a situación da lingua galega no século XXI.

Lois Dieguez, Xurxo Souto, F. Xosé Fernández Naval, Antía Otero, X. R. Freixeiro Mato, Dores Tembrás, Estibaliz Espinosa, Pilar Pallarés, Ánxeles Penas e Marcelino Fernández Mallo son as voces que reflexionan sobre o noso idioma na situación actual e achegan ideas e posibles solucións para que a lingua galega permaneza viva e vizosa.

Este proxecto quere animar a cidadanía galega a que faga tamén ese proceso de reflexión e actúe para mellorar o futuro da nosa lingua.