Arquivo da categoría: Lingua

Letras Galegas 2015

O Servizo de Normalización Lingüística e a Concellaría de Cultura organizan as actividades programadas para celebrar as Letras Galegas 2015, dedicadas este ano a Xosé Filgueira Valverde.

A Real Academia Galega decidiu dedicar as Letras Galegas 2015 ao insigne escritor e historiador pontevedrés, “para saldar unha débeda histórica que a RAG tiña con Filgueira Valverde”, en palabras do seu presidente Xesús Alonso Montero, quen “destaca o seu irreprochable compromiso coa defensa e promoción da cultura galega, así como o seu legado intelectual, que constitúe, pola súa amplitude e calidade, un dos máis importantes da segunda metade do século XX”.
A celebración das Letras Galegas 2015 no Concello de Redondela inclúe as seguintes actividades:

Letras Galegas 2015_web

Seguir lendo Letras Galegas 2015

VII Semana do libro, a festa das palabras

Un ano máis a colaboración entre o Servizo de Normalización Lingüística e as Bibliotecas Municipais dá como resultado a programación da VII Semana do libro, a festa das palabras.

Cartel_mes do libro VII_completo

Esta programación esténdese a todo o mes de abril, e alén da exposición multilingüe que estará accesible nas salas de lectura das bibliotecas municipais, están a desenvolverse presentacións de libros e, como novidade, unha actividade teatral para escolares vencellada moi directamente co libro: a representación teatral do “Espantallo amigo” de Xosé Neira Vilas, da man da compañía Os Quinquilláns.

A actividade desenvolveuse en tres sesións no auditorio da Xunqueira e no Piñeiral do Crego, e asistiron, entre o 14 e o 15 de abril, máis de 700 alumnos e alumnas de ensino primario de centros educativos redondeláns, que levaron asemade ás súas casas un exemplar da obra “Espantallo amigo”.

Non perdades de vista o resto das actividades programadas.

Volve o cinema en galego co ciclo VERSIÓN ORIXINAL

Baixo o nome de VERSIÓN ORIXINAL continamos o ciclo de 2013 e 2014, co obxectivo de ofrecer actividades de lecer en lingua galega e mostrar a súa riqueza e utilidade para as creacións audiovisuais. Ademais procuramos tamén a sensibilización da poboación para apoiar as producións que se fan en Galicia e o hábito a asistir a espectáculos na lingua propia.

Cartel_VersiónOrixinal2015A programación deste ano ofrece dous filmes, un para idades moi temperás e outro para público adulto, que se proxectarán o auditorio da Xunqueira, en alta definición.

O domingo 15 de marzo, ás 18.00 h, proxectarase o filme A tropa de trapo na selva do arco da vella, unha comedia de animación especialmente indicada para nenos e nenas de 2 a 6 anos, dirixida por Álex Colls e producida por Abano Producións, que estivo nominada ao premio Goya ao mellor filme de animación en 2014.

Seguir lendo Volve o cinema en galego co ciclo VERSIÓN ORIXINAL

QUICO CADAVAL E CELSO SANMARTÍN COS CONTOS DE JOSELÍN

O Servizo de Normalización Lingüística trae de novo a oralidade á escena.
Este sábado, 7 de febreiro de 2015, ás 20.00 h, o Centro Recreativo de Redondela acolle o espectáculo “Os contos de Joselín”.

Cartel contos_JoselínTrátase dun espectáculo que xoga coa comicidade das historias da nosa tradición oral e que provoca a hilaridade do público de calquera idade. Nel  aparecen historias de mortos, de caciques, de curas, de personaxes singulares… que chegan da man de dous grandes contadores galegos: Quico Cadaval e Celso F. Sanmartín.
Estes dous contadores volven os ollos á tradición dos contacontos a través dun teatro de actualidade, lúdico, crítico e aberto á interacción co público, e aproveitan a figura do narrador galego de máis éxito de todo o século XX: Joselín.

José Rodríguez Vicente, Joselín, é o protagonista dos primeiros documentos sonoros do teatro galego (1929-1954). Foi un home versátil e contraditorio, que tivo o seu maior momento de popularidade de 1929 a 1932, en Galicia, e xa nos anos 30, na Arxentina.

Admirado polos galeguistas republicanos e condecorado polas ditaduras, foi en ídolo de masas en Buenos Aires, guionista de cine en Madrid, e converteuse en supervendas discográfico en Galiza, España e Arxentina, cos seus vinte e tres ‘contos galegos’ gravados. A súa descuberta chegou hai uns meses cunha edición de aCentral Folque da súa obra gravada completa, editada nun libro-CD titulado Os contos de Joselín. José Rodríguez de Vicente. Primeiros documentos sonoros do teatro galego (1929-1954).

Cadaval e Celso conseguen fundir as súas narracións coa súa capacidade de improvisación narrativa nun espectáculo no que evocan a Joselín, nas súas facetas de contador e cantador de historias, e no que se achegan a temas de actualidade e interactúan co público. Ademais no espectáculo ofrecen tamén unha proxección de imaxes históricas de Joselín, e a oportunidade de oír un conto gravado na súa voz.

Quico Cadaval é un actor, director e adaptador teatral, impulsor do movemento de contacontos xurdido en Galicia na década dos noventa. Comezou nos anos sesenta na interpretación teatral co Centro Dramático Galego e a mediados dos oitenta fundou a súa propia compañía, “O Moucho Clerc”. Traballou en diferentes producións da televisión autonómica galega, así como en curtas e longametraxes, e na actualidade continúa vencellado ao audiovisual como actor e como guionista.

Celso F. Sanmartín é un contador de contos e historias de tradición oral, que continúa co movemento xurdido en Galicia nos anos noventa. Os seus contos beben directamente da tradición oral da súa comarca natal, o Deza, dun xeito orixinal e auténtico, que o converte nun referente neste estilo. As súas historias son xenuínas e chegan do máis fondo da sabedoría popular, desa transmisión oral que nos identifica como pobo.

As entradas para o espectáculo (5 € / 3 € para estudantes e xubiladas), están á venda no multiúsos da Xunqueira dende o xoves 5 de febreiro, e o mesmo sábado estarán á venda no Centro Recreativo de Redondela dende dúas horas antes á función.