Arquivo da categoría: Lingua

Radio en galego na rede

Un novo proxecto de radio en lingua galega vén de aparecer na rede: anfiteatrogzradio.

Como ela mesma explica na súa presentación, “é un proxecto de radio online en Idioma Galego”.

A súa intención é a de encher as 24 horas do día con programación de diversos contidos, coa finalidade de crear unha emisora no noso idioma que fomente os grupos musicais galegos, a literatura do noso País… e todo canto teña cabida no mundo da cultura.

Ademais quérenlle dar tamén cobertura a todos os blogs do blogomillo por medio do seu “player”.

Pois sexa benvida, que mentres outros medios desaparecen segue habendo novas iniciativas que pulan pola nosa lingua.

Concurso de presentacións para o Nadal

A Secretaría Xeral de Política Lingüística convoca a segunda edición do concurso de presentacións electrónicas de Nadal.

A iniciativa pretende promover o uso da lingua galega nas comunicacións propias destas festas aproveitando as novas tecnoloxías. Deste xeito as propostas terán que facer referencia a un tema vencellado a estas datas, como felicitacións de Aninovo, do Día de Reis ou das festas de Nadal en xeral.  Aqueles traballos máis enxeñosos e  orixinais serán os seleccionados para formar parte dunha galería de presentacións que a Secretaría Xeral divulgará a través do seu espazo web,  e os tres  traballos gañadores recibirán, ademais, un lote de produtos de lecer en galego.

As persoas que estean interesadas en participar poden enviar as presentacións a calquera dos seguintes enderezos electrónicos: secretaria.xeral.politica.linguistica.web@xunta.es ou a sxpl.secretaria@xunta.es.

O prazo de admisión das propostas remata o día 9 de decembro de 2011.

Pódense consultar as BASES nesta ligazón.

E se queredes consultar os traballos gañadores da anterior edición pódense ver AQUÍ.

Novo conxugador de verbos en rede

O grupo de investigación ProLNat@GE (Grupo para o Procesamento da Linguaxe Natural) da Universidade de Compostela, especializado en enxeñaría lingüística, vén de poñer na rede, a disposición de calquera persoa usuaria, un conxugador de verbos en lingua galega: CILENIS CONXUGADOR.

Cilenis é o nome desta empresa dedicada ao procesamento da linguaxe e á enxeñaría lingüística.

O conxugador, de moi fácil consulta,  xera automáticamente conxugacións verbais en galego. Permite conxugar calquera verbo (mesmo inventados) ou escoller só aqueles infinitivos que forman parte do Vocabulario Ortográfico da Lingua Galega (VOLG). E como engadido, dispón tamén dunha versión en portugués.

Cilenis Conxugador é software libre, pois a filosofía da empresa é promover o acceso libre ao coñecemento, e pode ser complementado con aplicacións e sistemas externos. Foi desenvolvido con base no sistema de código aberto conshuga.

Desde a empresa anuncian que pretenden traballar no desenvolvemento de ferramentas de busca a medida na rede e que ofertan tamén servizos de instalación, personalización e mantemento do tradutor Opentrad.

Proba co teu verbo aquí.

Ditados tópicos galegos, alcumes e algo máis

Unha nova publicación vén dar luz aos nosos nomes: xentilicios, alcumes de nomes colectivos, e mais refráns e coplas aparecen recollidos no Portal de ditados tópicos galegos, un traballo elaborado e divulgado polo Instituto da Lingua Galega da USC (ILG) e a Fundación Camilo José Cela.

O proxecto xurdiu inicialmente con fichas recollidas para o Diccionario Geográfico Popular de España (DGPE), impulsado nos anos setenta polo escritor Camilo José Cela. Nel recompílanse este tipo de informacións, incorporando material xa publicado en refraneiros ou obras literarias, pero que inclúe ademais a realización de enquisas por toda España, información de primeira man que enche a maior parte da información do proxecto. Para esta tarefa contouse daquela coa entusiasta colaboración do corpo de Correos, que distribuíu entre o seu persoal de reparto máis de 25.000 cuestionarios para que informasen dos alcumes, xentilicios, cantigas ou refráns existentes nas súas demarcacións. Do DGPE só se publicou un tomo (dos 19 previstos), en 1998. As fichas consérvanse inéditas na Fundación Camilo José Cela en Iria Flavia.

En xuño de 2008, o Instituto da Lingua Galega asinou un convenio coa Fundación Camilo José Cela para dixitalizar e editar as fichas do DGPE recollidas no territorio galego. Así, o Portal de ditados tópicos galegos recolle inicialmente case 4.000 rexistros (1559 alcumes colectivos, 1207 xentilicios, 328 refráns, 786 coplas e cantares e 42 pseudotopónimos). Estas formas están recollidas nunha base de datos en liña que permite facer buscas a medida, por exemplo, para REDONDELA.
O portal web tamén permite consultar material complementario, como correspondencia entre Camilo José Cela e o persoal de Correos ou representantes da intelectualidade galega, así como diversas publicacións ligadas ao proxecto.
Os investigadores Damián Suárez Vázquez, David Rodríguez Lorenzo e Xosé Afonso Álvarez Pérez, e o informático César Osorio Peláez, son as persoas encargadas do proxecto nesta primeira fase, co obxectivo de  “preservar este rico e abundante patrimonio inmaterial”, como subliñou a profesora e directora do ILG,  Rosario Álvarez. En sucesivas etapas, o portal irase enriquecendo con información procedente doutras fontes (refraneiros, cancioneiros, artigos monográficos,…) e, incluso, mediante achegas do público que o consulte a través dun formulario dispoñible na web.
Máis información no XORNAL da USC