Arquivo da categoría: Dinamización

O “DECAMERÓN” DE CÁNDIDO PAZÓ

O Servizo de Normalización Lingüística organiza a representación do monólogo teatral de Cándido Pazó, “Decamerón. Historias para tempos ruíns”.

Decamerón_Cándido Pazó  Este espectáculo, xunto cos monólogos do vindeiro sábado 7 de febreiro (“Os contos de Joselín”), forma parte da programación trimestral do SNL no ámbito cultural, e vén complementar o festival de monólogos, Lareta, que se celebrou en Chapela no outono.

O obxectivo fundamental é achegar creacións escénicas en lingua galega de calidade, onde a lingua oral se transmite con toda a súa potencialidade. As dúas funcións que se ofrecen agora están cofinanciadas pola AGADIC a través da Rede Galega de Teatros e Auditorios.

O Decamerone, o libro de contos escrito no s. XIV por Giovanni Boccaccio, é todo un referente da narrativa europea e unha das lecturas máis celebradas ao longo dos séculos. Os contos que contén están inzados de humor, sentido gozoso da vida e erotismo, e supuxeron unha ruptura radical coas tebras do mundo medieval e un sinal inequívoco da nova visión do mundo que supuxo o Renacemento.

Nesta versión que nos presenta Cándido Pazó, coa adaptación teatral de Abrapalabra Creacións Escénicas, están adaptados unha presa de contos do orixinal, os máis divertidos e mordaces, que aproveita dun xeito metafórico para achegarse á actualidade. Nos contos de Boccaccio, uns mozos que foxen da peste bubónica atopan refuxio nunha quinta campestre e comezan a se contar historias. A reinterpretación de Pazó achégase máis á “peste económica”, o andazo de hoxe, do que non podemos fuxir pero que o teatro nos axudará a levar dun xeito máis divertido e reconfortante.

A representación celebrarase o sábado 31 de xaneiro, ás 20.00 h, no Centro Recreativo de Redondela. As entradas poranse á venda dende o xoves no multiúsos da Xunqueira, e o sábado no propio Centro Recreativo, cun prezo de 5 € (3 € para persoas xubiladas e estudantes).

Axenda escolar redondelá 2014-2015

O Servizo de Normalización Lingüística e a Concellaría de Ensino do Concello de Redondela, en colaboración cos centros de ensino público redondeláns (a través da Coordinadora ENDL de Redondela), editaron de novo a Axenda escolar redondelá, que recibirán preto de 1900 alumnos e alumnas dos centros de ensino públicos redondeláns para o curso 2014-2015 . Axendas escolares1

As axendas estanse a distribuír de balde entre o alumnado de ensino primario do CEP Santa Mariña, CEIP Alexandre Bóveda, CEIP de Cedeira, CEIP Igrexa– Chapela, CEIP Laredo, CEIP Outeiro das Penas, CEIP Porto-Cabeiro, CEIP Quintela e CEIP Santo Paio de Abaixo, e de 1º ciclo da ESO do IES Chapela, IES Illa San Simón, IES Mendiño e IES Pedro Floriani.

Este é o terceiro ano consecutivo que se publican estas axendas co obxectivo de divulgar aspectos da cultura e do patrimonio locais entre a poboación máis nova, e contribuír a normalizar o uso da lingua galega entre o alumnado redondelán.

A edición para o curso 2014-2015 inclúe algúns traballos de dinamización cultural e normalización lingüística desenvolvidos durante o curso pasado (coma as funcións escolares de teatro ou monicreques); iniciativas a prol da lingua galega coma o videoclip “Terra”; información relativa a construcións populares e tradicións; historias relacionadas coa tradición redondelá; elementos do patrimonio arquitectónico; divúlgase a figura de Rita Otero, persoeiro redondelán homenaxeado en 2014; recupérase parte do patrimonio inmaterial a través de ditos e coplas; a onomástica en lingua galega; e inclúe as conmemoracións escolares e as celebracións de Redondela.

Poderase descargar en breve, en formato pdf, do blog do SNL http://servizonlredondela.blogaliza.org/, e mais no da Coordinadora ENDL  de Redondela http://coordinadoraendlredondela.blogspot.com.es/

Esta publicación foi posible grazas á participación dos centros de ensino público redondeláns, e ano a ano foise convertendo nunha ferramenta útil para a organización escolar do alumnado e nun elemento necesario para a promoción da lingua galega e do patrimonio redondelán entre a poboación escolar.

Pódese descargar na seguinte ligazón: http://issuu.com/servizonormalizacionlinguisticaredo/docs/axenda_esc._redondel___2014-2015/1

Letras Galegas 2014

Arrincou a programación das Letras Galegas 2014, nas que se rende homenaxe ao poeta e tradutor de Guitiriz, Xosé Mª Díaz Castro (1914-1990).

O Servizo de Normalización Lingüística e mais a Concellaría de Cultura adquiriron exemplares de dous libros do autor para divulgar a súa obra, que serán repartidos neste mes entre as asociacións culturais redondelás e nas bibliotecas públicas:

NIMBOS                                  XOSÉ Mª DÍAZ CASTRO, VIDA E OBRA

A programación de actos conmemorativos e de homenaxe esténdese dende o propio 17 de maio até o domingo 6 de xullo.

O SNL deseñou e distribuíu tamén marcapáxinas conmemorativos nos que se inclúen algúnhas ligazóns para sabermos máis de Xosé Mª Díaz Castro:

Páxina oficial de Díaz Castro

Díaz Castro na RAG

Díaz Castro na SXPL

Letras Galegas 2014 na CGENDL

VI Semana do libro, a festa das palabras

As Bibliotecas de Redondela e mais o Servizo de Normalización Lingüística organizan VI Semana do libro, a festa das palabras.

Esta celebración que xira arredor da data sinalada do 23 de abril como Día Mundial do Libro, artéllase para divulgar o libro como un elemento de cultura e enriquecemento persoal e social, e incide na animación á lectura e na divulgación das linguas que nos son máis próximas, as que se falan na Península Ibérica: galego, castelán, portugués, asturiano, éuscaro, aragonés, catalán e aranés.

Este evento, centrado inicialmente nunha semana de actividades esténdese, neste 2014, a todo o mes de abril, onde ademais de celebrarse a exposición multilingüe habitual, vanse desenvolver relatorios, actividades de promoción da oralidade e presentacións de diversas publicacións, unhas abertas a toda a cidadanía e outras para alumnado dos centros de ensino redondeláns.

Os materiais que conforman a exposición son achegas de distintos organismos que veñen colaborando nos últimos anos coa doazón de libros e revistas, como o Instituto Camões de Vigo, o Euskara Sustatzeko Zuzendaritza – Dirección de Promoción do Éuscaro (Goberno Vasco), a Secretaría de Política Lingüística da Generalitat de Catalunya, a Academia de la Llingua Asturiana, a Academia de L’Aragonés, e dos propios fondos das bibliotecas redondelás.

Esta mostra multilingüe achega un valor engadido á propia celebración do día do libro, pois xunta o obxectivo inicial de procurar unha animación á lectura co obxectivo transversal de divulgar a diversidade cultural e lingüística dos territorios máis próximos a nós. O coñecemento doutras realidades lingüísticas contribuirá tamén a que aprendamos a valorar a riqueza cultural e lingüística doutros pobos, a interesarnos polo seu coñecemento e a considerar mellor a nosa propia.

A exposición multilingüe estará instalada do 21 ao 23 de abril no Multiusos do Piñeiral do Crego, e do 24 ao 30 no Multiusos da Xunqueira. A programación deste ano inclúe as seguintes actividades:

mércores 2 de abril, ás 11.30 h. Pedro Feijoo:  A MEMORIA DA CHOIVA. Charla co alumnado do IES Mendiño sobre Os fillos do mar e presentación de A memoria da choiva.

martes 8 de abril, ás 20.00 h. X. Henrique CostasO VALEGO, as falas de orixe galega do Val do Ellas (Cáceres-Estremadura). Casa da Cultura. Entrada libre.

martes 15 de abril, ás 20.00 h. Manuel Gago. Vento e Chuvia: unha ollada á relixión e á mitoloxía da Idade do Ferro en Gallaecia. Casa da Cultura. Entrada libre.

martes 22 de abril.

  • Ás 10.30 e 12.00 h: Modestos contos de Broadway. LEIXAPRÉN. Obradoiros plástico-literario-musicais no Auditorio do Piñeiral do Crego para o alumnado do IES Chapela.
  • Ás 12.00 h. Soledad Felloza: teatralización sobre “Os antigos deuses galaicos”, para o alumnado dos IES Mendiño, Illa de San Simón e Pedro Floriani. Auditorio da Xunqueira.
  • Ás 20.00 h. Olga Lalín e Esther Medraño. Sensibilizando sobre o autismo. Presentación do libro HADA ESTHER. Casa da Cultura. Entrada libre.

martes 29 de abril, ás 20.00 h. Gemma Sesar: VIDA DE NAI. Multiusos do Piñeiral do Crego. Entrada libre.