Arquivo da categoría: Dinamización

Día da Lingua Materna

Como vimos facendo nos últimos anos, hoxe lembramos de novo a celebración do Día Internacional da Lingua Materna.

O obxectivo desta celebración,  declarada pola UNESCO en 1999,  é impulsar as linguas maternas en todo o mundo e, maiormente, as das minorías, por seren as que se encontran nunha situación máis difícil. Deste xeito incídese na promoción da diversidade lingüística e cultural, ao tempo que se impulsa o recoñecemento, o uso e a divulgación das linguas maternas, especialmente as das linguas con menos falantes.

O Día Internacional vense celebrando dende febreiro de 2000 para promover a diversidad lingüística e cultural, e impulsar o multilingüismo. Esta data comemora o mesmo día de 1952, cando estudantes que se manifestaban polo recoñecemento da súa lingua,  o Bangla (un dos dous idiomas nacionais da entón Pakistán), foron asasinados a tiros pola policía de Dhaka, a capital do que hoxe é Bangladesh.

Nós temos, como galegos e galegas, o privilexio de termos unha lingua propia, e de vivir nunha comunidade que ten dous idiomas oficiais;  e isto, lonxe de ser unha traba ou un peso, constitúe unha riqueza e unha gran oportunidade.

Termos lingua de noso fornécenos dunha identidade colectiva que une a todos os galegos independentemente de cal sexa o idioma que falan habitualmente. Termos lingua e cultura de noso amplía o noso universo de comunicación e constitúe unha ponte que facilita o acceso a outros idiomas e culturas. É un valor engadido, unha marca que nos singulariza e dá prestixio, que nos sitúa no mundo como colectividade que ten algo máis e distinto para ofrecer. Por iso é tamén unha responsabilidade que os galegos debemos asumir: é a nosa obriga contribuír co galego ao patrimonio cultural da humanidade.

Se mantemos e incorporamos a lingua galega  á comunicación familiar, os nosos fillos ligarán o idioma que nos une coa afectividade do fogar e adquirarán máis doadamente a competencia nel.

A nosa encomenda para este día, e para todos os días do ano,  é facerlles ver aos nosos cativos que nos rodean moitas linguas e que todas son igualmente importantes, pero que a nosa lingua propia é o celme do noso ser como pobo, e o noso xeito de entender o mundo.

PRESENTACIÓN DA SXPL – Lingua_Materna_2011.swf

Contacontos nas escolas infantís

Esta semana comezaron as actividades de dinamización lingüística para os escolares de ensino infantil a través de contacontos.

Nunha primeira fase, estas actividades de promoción da lingua galega consistirán en contacontos que se achegarán ás dúas escolas infantís existentes nas parroquias do noso concello: a EEI de Ventosela e a EEI San Pedro, de Cesantes. Deste xeito, nunha mesma actividade promociónase a utilización da lingua propia, e incídese tamén na animación á lectura e no gusto por contar historias, ao que se anima tamén aos pais e avós.

No día de onte celebrouse a primeira das sesións, na EEI de Ventosela, onde tamén participaron pais e avós dos cativos alí escolarizados, xunta a algún irmán pequeno. A representación estivo a cargo da contadora do grupo Xerpo, Lúa con luvas.

Mañá venres, 18 de febreiro, celebrarase a seguinte función na EEI San Pedro, de Cesantes. Haberá unha sesión de contacontos ás 12.00 h, a cargo do contador do grupo de teatro Xerpo, Andreu Chapeu, á que tamén están convidados pais, avós e irmáns pequenos dos alumnos do centro, e calquera outro neno da parroquia que aínda non estea en idade de escolarización.

O achegamento desta actividade ás parroquias quere contribuír a espallar a nosa lingua e a promover o seu uso entre os máis pequenos e, asemade, levar espectáculos á poboación rural que non adoita ter a man as actividades culturais programadas polos concellos.

Ao longo dos vindeiros meses continuarase con actividades de achegamento da lingua galega ao alumnado de infantil dos distintos centros de ensino do concello, xustamente a franxa de idade na que o galego ten menos presenza e necesita ser impulsado.

A cuarta parede, cinema en galego

Aínda que nas salas comerciais é case inexistente o cinema en lingua galega, a nosa lingua vai ser un pouco máis visible  no mundo do cinema a travé dunha web de recente creación sobre cinema. 

A CUARTA PAREDE é o nome desta plataforma que se converte na primeira revista dixital en galego de crítica cinematográfica.

Nela pódense ver dende as críticas das películas máis comerciais, as que están na actualidade na grande pantalla dos cinemas, até o cinema independente ou o cinema portugués actual.

E falando de cine galego, a través da páxina da Axencia Audiovisual Galega tamén podemos saber das últimas novidades do cinema do país,  visualizar os tráilers das longametraxes e moitas das curtas que se fan en Galiza a través do portal de FLOCOS.TV

A nosa lingua está cada vez máis visible, tamén no cine.

Galeguizar Galicia TV

A lingua galega volve ser visible a través dunha canle de televisión.

No mes de decembro falabamos de Lingua Galega TV, un portal de televisión por internet dedicado integramente á divulgación, promoción e coñecemento da lingua galega.

Desta volta os colectivos que forman parte de galeguizargalicia.com acaban de pór en marcha a canle galeguizargalicia.tv, a través da que difunden os vídeos das súas actividades a prol da lingua.

O Foro Enrique Peinador, a Asociación Álvaro das Casas, a Asociación de Amigos do Couto Mixto, a Fundación Lois Peña Novo, a Irmandade Xurídica Galega e a Asociación de Funcionarios para a Normalización Lingüística, puxeron en marcha a canle :

Galeguizargalicia.tvO obxectivo desta nova canle de TV é  darlle maior difusión a todas as iniciativas relacionadas coa lingua galega e coa súa proxección social. Rretransmitirá en directo os actos públicos programados, así como mesas redondas, reportaxes e mensaxes publicitarias. E ademais recuperará aqueles fitos históricos nos que participou dende os seus inicios e que serviron para visibilizar a lingua galega nos diferentes eidos da vida colectiva dos galegos e galegas.

Entre eles atopamos algún que ten moito que ver co noso concello. Poñemos aquí o vídeo gravado en Redondela co gallo da homenaxe a Ramón Cabanillas en xuño de 1997.