Arquivo da categoría: Cultura

Cinema infantil para o Nadal

Este Nadal, dentro das actividades de lecer para os máis pequenos, e co obxectivo de mostrar a utilidade e riqueza da lingua galega na creación audiovisual, proxectaranse dous filmes galegos de animación de grande prestixio e recoñecemento: “O bosque animado” e “O soño dunha noite de San Xoán”.

As proxeccións desenvolveranse no Multiusos do Piñeiral do Crego en Chapela, e no Multiusos da Xunqueira en Redondela, con entrada libre e de balde.

O BOSQUE ANIMADO (2001), dirixida por Ángel de la Cruz, conta a vida no bosque, onde conviven en paz animais e árbores até que aparece un novo e estraño veciño: o poste. Cando a harmonía do entorno é alterada pola man do home, os moradores do monte loitarán para recuperala.

  • Luns, 23 de decembro, ás 18.00 h, no Auditorio do Piñeiral do Crego, Chapela.

  • Luns, 30 de decembro, ás 18.00h, no Auditorio da Xunqueira.

Foi a primeira longametraxe de animación europea en 3D e obtivo numerosos premios e recoñecementos, entre os que destaca o premio Goya á mellor produción de animación en 2002.

O SOÑO DUNHA NOITE DE SAN XOÁN (2005), dirixida por Ángel de la Cruz e Manuel Gómez, está baseada na obra de William Shakespeare.

Din as lendas que unha noite ao ano, no San Xoán, os humanos poden acceder ao Mundo Máxico. Elena, intelixente pero pouco soñadora, non cre en contos. Pero cando cae enfermo seu pai, o duque Teseo, ela está disposta a calquera cousa para lle devolver a ilusión. Mesmo ir na procura de Titania, a raíña das fadas. Mais o Mundo Máxico xa non é o que era…

  • Domingo, 29 de decembro, ás 18.00 h, no Auditorio da Xunqueira.

  • Luns, 30 de decembro, ás 18.00 h, no Auditorio do Piñeiral do Crego, Chapela.

No seu palmarés conta cun premio Goya da Academia Española á mellor película de animación en 2006.

A entrada é libre e de balde até completar aforamento.

A nena e o grilo nun barquiño arriba a Redondela

A Secretaría Xeral de Política Lingüística trae a Redondela a actividade musical “A nena e o grilo nun barquiño”, incluída dentro do programa de Dinamización Lingüística FalaRedes.


Trátase dunha actividade dirixida aos máis novos e ao público familiar que complementa as iniciativas de promoción da lingua galega desenvolvidas dende a RDL (Rede de Dinamización Lingüística) á que pertence o Concello de Redondela.

FalaRedes pretende crear espazos de uso e de aprendizaxe en galego nos ámbitos do lecer e da cultura, ligando a imaxe da lingua galega aos valores positivos da sociedade moderna, co obxectivo de reforzar o uso do galego entre persoas galegofalantes e facilitar a interacción en galego á poboación infantil e á mocidade castelá falante.

Nesta ocasión chega a Redondela A nena e o grilo nun barquiño, un espectáculo musical para toda a familia con cancións de Magín Blanco, no que a nena e mais o grilo van emprender unha viaxe que lles permitirá descubrir o mundo, as súas aventuras e os seus segredos. A solidariedade, o respecto á natureza, a identidade… son algúns dos valores que transmiten os personaxes a través das súas propias peripecias e das letras das cancións que as acompañan. Magín Blanco estará acompañado por un grupo de 5 músicos que farán vibrar aos máis pequenos coas súas contaxiosas melodías, cos seus ritmos vibrantes e as letras máis divertidas.

A actuación celebrarase no Auditorio da Xunqueira de Redondela o domingo día 1 de decembro ás 12.00 h.

As entradas son de balde pero é preciso retiralas no propio Multiusos da Xunqueira a partir do martes 26 de novembro.

Aquí deixamos unha pequena mostra do que se vai escoitar no espectáculo.

 

LARETA 2013, Festival de monólogos de Redondela

 O Servizo de Normalización Lingüística organiza a segunda edición do Festival de Monólogos de Redondela, LARETA 2013.

Trátase dun evento cultural que naceu en 2012 co obxectivo de fomentar o uso oral da lingua galega e de promover a creación artística daquelas persoas que apostan pola nosa lingua como ferramenta de traballo e medio de comunicación.

O nome do festival de monólogos, LARETA, quere incidir precisamente niso: en laretar, falar sen control e sen medida, dicir o que se queira pero sempre utilizando a lingua galega como vehículo de comunicación. Alén diso, quere ser tamén unha proposta creativa e artística con continuidade no tempo, que se converta nun referente dentro da oferta cultural redondelá e que vén avalada polo éxito da súa primeira edición.

Nesta segunda edición, que se celebrará os sábados ás 20.00 h, contaremos coa participación de Luís Zahera, Quico Cadaval, Sergio Pazos e Cándido Pazó para público adulto, e Paula Carballeira para público infantil.

As sesións celebraranse no Auditorio da Xunqueira de Redondela os sábados 16, 23 e 30 de novembro, e 7 e 21 de decembro. O prezo da entrada xeral é de 4 €, e para persoas xubiladas, estudantes e público infantil 2 €. Mais é posible tamén adquirir un bono para as cinco funcións ao prezo de 16 € ou 8 € para a entrada reducida, que se poderá reservar dende o xoves 7 de novembro.

A venda de entradas anticipadas para cada función farase dende dous días antes a cada unha, na recepción do Multiusos da Xunqueira.

O Servizo de Normalización Lingüística anima a toda a veciñanza redondelá a asistir a esta proposta cultural que reivindica o uso oral da lingua propia de Galicia.

Recuperando a toponimia redondelá

Retomamos os traballos de recuperación da microtoponimia, os nomes de lugar, a través dun traballo de recollida que vai desenvolver  TRESPÉS no vindeiro trimestre, nas parroquias de Cabeiro e Vilar de Infesta.

Co fin de informar sobre este proceso e sensibilizar a poboación destas parroquias, e á poboación redondelá en xeral, sobre a importancia dos nomes de lugar como parte do noso patrimonio e o seu significado dentro da cultura propia, desenvolveuse onte un  relatorio impartido polo profesor e estudoso redondelán Xosé Couñago Ribeira, baixo o título: Os nomes de lugar, patrimonio inmaterial da parroquia. Ademais, Paulo Jablonski, un dos membros da sociedade cooperativa TREPÉS, explicou como se vai desenvolver o proceso de recollida e solicitou a implicación dos veciños e veciñas como informantes de primeira man en todo este proceso de posta en valor dos nomes de lugar da parroquia. Para isto tamén se vai aproveitar o traballo de recollida que fixeron dende o propio Centro Cultural de Cabeiro no ano 2010.

O pasado ano, froito da participación nun curso de toponimia organizado polo IEM (Instituto de Estudos Miñoranos), a Universidade de Vigo e os Concellos de Vigo e Pontevedra, realizouse a recollida da microtoponimia noutras dúas parroquias: Saxamonde e Negros. Os resultados destes traballos de recuperación e xeorreferenciación van ser expostos en breve nos dous centros culturais correspondentes a estas parroquias, co fin de que a veciñanza poida corrixir ou completar a información recollida neses mapas.

O rexistro desta valiosa información é fundamental para evitar que se perda ese rico patrimonio, que nos transmite información da historia, dos usos e costumes, e dos lugares máis significativos de cada territorio, dende os nomes dos camiños e corredoiras, pasando polas terras de cultivo, o monte, os ríos e regatos, e construcións singulares e comunitarias como cruceiros, fontes ou lavadoiros.

O vindeiro xoves, 3 de outubro, farase a presentación deste proxecto no Centro social e cultural de Vilar de Infesta, onde Xosé Couñago dará tamén unha charla sobre os nomes de lugar.