Actividades de dinamización lingüística no Nadal

O Servizo de Normalización Lingüística continúa con novas actividades lúdicas e formativas para reforzar a oferta do APEGO, o programa de dinamización lingüística para a primeira infancia.

CartelApegoNadal2015_RedondelaO vindeiro martes, 22 de decembro, chegará ao Auditorio da Xunqueira o espectáculo teatral A miña primeira viaxe, da compañía Xarope Tulú, unha peza teatral dirixida aos cativos e cativas de entre 3 e 10 anos. Este espectáculo é unha adaptación do libro-álbum do mesmo título escrito por Paloma Sánchez Ibarzábal e publicado por OQO editora en febreiro de 2012.

A miña primeira viaxe é a historia do comezo da vida humana. Un bebé viaxa dentro da súa cápsula por un universo descoñecido, non sabe cara a onde vai, nin quen é. Pero non ten medo se sente o TUM-TUM dos motores. Esta é unha historia de transformación, de procura da propia identidade.

A función comeza ás 18:00 h no Auditorio da Xunqueira e ten aforamento limitado. As entradas pódense adquirir dende o día anterior á función cun prezo de 2 € para público infantil, e 4 € para adultos.

O domingo 3 de xaneiro será o momento de gozar de música infantil en galego da man de Paco Nogueiras, que presenta o seu traballo Brinca Vai.

“BRINCA VAI!” son 12 cancións para os 12 meses do ano, todas elas compostas e interpretadas por Paco Nogueiras nun amplo abano de estilos musicais: techno, rock, folc, reggae ou música electrónica.

O espectáculo mostra o contido musical o libro-disco do mesmo nome, publicado por Kalandraka, con ilustracións de David Pintor.

A música e a diversión están garantidas con este músico do chapeu azul que fará brincar e cantar a toda a rapazada.

A función será ás 18:00 h no Auditorio da Xunqueira, con entrada única a 3 €.

E como actividade formativa, os días 14 e 21 de xaneiro vaise desenvolver un Obradoiro de recursos en galego para persoal da escolas infantís, coa intención de facilitar ao persoal que traballa nos centros de ensino e nas escolas infantís de Redondela recursos e materiais de aula para desenvolver o seu traballo diario en lingua galega. Neste obradoiro desenvolvido por Fabaloba, presentaranse diferentes actividades de sensibilización (audiovisuais, debates e outras dinámicas para a reflexión) e diversos materiais educativos para o alumnado de ensino infantil.

O obradoiro desenvolverase na Casa de Cultura de Redondela, os xoves 14 e 21 de xaneiro, en horario de 16:30 a 20:30 h.

A actividade é de balde e con prazas limitadas, polo que cómpre inscribirse a través do teléfono 986 400 106 ou no  correo electrónico normalizacion@redondela.es.