Dicionario da RAG en liña

A Real Academia Galega (RAG), aproveitando a presentación da súa nova páxina web, vén de divulgar o seu novo dicionario electrónico en liña.

Esta agardada ferramenta de consulta vén substituír o anterior dicionario en liña (1997), que non incluía os cambios relativos á última modificación das normas ortográficas e morfolóxicas da lingua galega (aprobadas pola institución académica en 2003), achéganos a norma da lingua galega no referente ao léxico. Poderemos atopar a ortografía normalizada das palabras e os seus significados, así como valiosa información sobre a pronuncia, as propiedades gramaticais, os sinónimos, os antónimos, o rexistro, e outros datos útiles para o uso correcto da lingua. Ademais, xunto ás acepcións do termo buscado poderemos atopar tamén distintos exemplos de uso, que facilitarán o entendemento.

Este dicionario seguirá sendo actualizado de xeito continuado polo Seminario de Lexicografía da RAG, para converterse nunha mostra viva do galego moderno.  Asemade, o Dicionario incorpora a terminoloxía científica manexada nos niveis de estudos medios, así como as locucións e os fraseoloxismos de maior relevancia, cos seus significados e exemplos correspondentes.

Ademais, na propia web podemos atopar, desde unha guía de uso ou unha listaxe das abreviaturas empregadas, até un apartado con RECURSOS, cun fácil acceso ás Normas ortográficas e morfolóxicas da Lingua Galega, á Cartografía dos apelidos de Galicia, ou ao Dicionario de pronuncia da lingua galega, entre outros.

 

 

Radio música en galego

A música en galego non adoita escoitarse nas emisoras de radio convencionais. Porén, unha nova emisora de radio en liña permítenos escoitar música en galego, dos máis diversos estilos, as 24 horas.

MUSICA EN GALEGO dános a posibilidade de escoitar a música que se fai no país dende o noso propio computador. Ademais, pódese instalar en calquera web ou blog dun xeito moi doado, e compartir este recurso con todas as persoas que visiten o teu sitio.

Na súa web pódense consultar tamén novidades de concertos, ligazóns de interese, libros relacionados coa música, e todos os grupos/solistas clasificados por estilos musicais.

Unha boa oportunidade para escoitar a música feita na nosa lingua, de balde, que poderás seguir tamén no Facebook.

 

 

 

Día internacional da narración oral

Hoxe, 20 de marzo, celébrase o Día Mundial da Narración Oral.

A iniciativa, que comezou coa celebración dos narradores suecos a principios dos anos 90, coincidindo coa chegada da primavera, é hoxe unha festividade que se celebra en todo o mundo co obxectivo de difundir o rico patrimonio cultural que se foi transmitindo de boca a boca no decorrer dos tempos.

Este día celébrase en todo o Estado, e hoxe celebrarase, por primeira vez, tamén en Galicia. Santiago de Compostela celebra un evento organizado por Varios Ventos, a Asociación de Narradoras/es Orais de Galicia, no que se xuntarán narradores profesionais e, logo, o Pub Atlántico acollerá dúas sesións de maratón de contacontos para o público xeral, ás 21 e ás 10.30 horas, nas que participarán Cándido Pazó, Soledad Felloza, Celso F. San Martín, Charo Pita, José Campanari, Avelino González, Raquel Queizás, Tim Bowley, Pepo Suevos, Oswaldo Digón e Pedron Brandariz, entre outros.

Para animar a toda a poboación redondelá, e ao resto da galega, a que conte contos aos achegados, sobre todo aos máis pequenos, mostramos este vídeo, baseado nun conto tradicional galego, que foi producido polo Xabarin club da TVG para apoiar a campaña do Patrimonio Inmaterial Galego na UNESCO.

E para gozar de novos recursos que nos axuden a transmitirlle aos máis cativos o gusto polos contos e as historias contadas na nosa lingua, recomendamos a páxina CONTOS PARA VER E CONTAR.

Que gocedes da riqueza do noso patrimonio oral, hoxe e o resto dos días do ano.

Mil festas máis para a lingua galega

A Asociación de Funcionarios para a Normalización Lingüística promove, unha vez máis, a campaña MIL FESTAS MÁIS PARA A LNGUA GALEGA.

O obxectivo desta iniciativa é promover unhas festas INNOVADORAS, PARTICIPATIVAS E GALEGUIZADAS, nas que conflúan a nosa cultura e a nosa lingua como recursos básicos das celebracións.

Para iso promoven unha serie de propostas que incidan na valoración dos nosos sinais de identidade, a cultura que nos é propia e nos identifica como pobo, e eviten a súa marxinación. Unha das achegas é a homenaxe a Prudencio Romo, fundador de Los Tamara, grupo musical pioneiro na década dos 60 en facer música lixeira e popular en galego.

Dende este SNL animamos a todas as comisións de festas e asociacións veciñais e culturais a que organicen e reivindiquen nas súas celebracións a promoción da nosa cultura e a nosa lingua.

Pódese consultar o manifesto premendo na imaxe.