SINBAD en Redondela

O Servizo de Normalización Lingüística do Concello de Redondela inaugura unha nova tempada de cinema en lingua galega, coa finalidade de promover o achegamento da sétima arte tamén na nosa lingua e contribuír á divulgación do cinema galego.

O filme que se proxectará é SINBAD, dirixido por Antón Dobao e cuxo guión foi elaborado por el mesmo e Marcos Nine, baseado na novela de Álvaro Cunqueiro “Se o vello Sinbad volvese ás illas”. Trátase dunha coprodución da Televisión de Galicia e mais Ficción Produccións, que chega a Redondela grazas á colaboración do AGADIC  e mais da produtora.

Conta cun reparto excepcional, formado por grandes nomes do teatro e o cinema galegos: Xosé Manuel Olveira “Pico”, Sara Casasnovas, Mariña Sampedro “Coco”, Luís Zahera, Manuel Cortés, César Cambeiro, Antonio Durán “Morris”, Laura Ponte, e a colaboración especial de Mela Casal e Miquel Ínsua.

O fío da película conta a historia dun vello mariñeiro que vive tranquilamente nunha vila mariñeira, adicando o seu tempo ao coidado da súa horta, a pasear a carón do mar e a fabular. Este mariñeiro, agora retirado, que percorreu os mares coñecendo personaxes extraordinarias, foi testemuña e protagonista de feitos fantásticos. A Sinbad, que é como el quere que lle chamen, acompáñao Sara, unha nena que aprenderá con el os segredos deses mundos fantásticos, e será a que o una ao seu último proxecto: pilotar unha nave extraordinaria que o leve ás Illas Cotovías.

O filme é apto para todos os públicos e recoméndase para maiores de 9 anos. Proxectarase o vindeiro venres, 3 de febreiro, ás 19.00 horas, no Auditorio do Piñeiral do Crego de Chapela. E novamente, o sábado, 11 de febreiro, ás 19.00 horas, no Auditorio da Xunqueira de Redondela.
A entrada é de balde.

Dende o Servizo de Normalización Lingüística anímase a toda a veciñanza a que asista a esta proxección, que servirá para achegármonos ao cinema na nosa lingua, especialmente a poboación infantil, e que contribúe a demostrar que a lingua galega serve para todas as manifestacións artísticas e culturais.

Topónimos do Campus de Vigo

A Universidade de Vigo elaborou un mapa toponímico do seu campus.

Chan da Lagoa, A Pedreira, A Xunqueira, A Cumieira… son algúns dos nomes que mostran a riqueza toponímica do campus de Vigo que, de recuperar o nome tradicional dese lugar, poderíase chamar Campus de Vilariño.

A Vicerreitoría de Extensión Universitaria decidiu recuperar todos eses topónimos para contribuír a protexer os nomes tradicionais de Galicia, que en moitos lugares están a piques de desaparecer, e que noutros casos foron substituídos por termos artificiais ou inventados.  Iván Sestay, titulado da Facultade de Filoloxía e Tradución, que xa ten elaborado estudos de nomes de lugar en Moaña ou no barrio vigués de Coia, foi o encargado de elaborar este traballo. A recollida destes microtopónimos foi representada nun mapa que servirá para divulgalos e identificalos sobre o terreo.

Segundo manifestou a Vicerreitoría “A idea é divulgar o significado, antigüidade e orixe dos topónimos, practicamente todos eles transparentes e de orixe latina… recomendarase a súa utilización e marcaranse sendeiros e vieiros cos nomes“. Ademais  tratarán de trasladar estes nomes á sinaléctica,  para o que están en contacto co Concello de Vigo,  e estase a traballar tamén para que estes datos se inclúan en aplicacións coma o Googlemaps, Google Earth ou GPS.

Máis información no DUVI

VITAMINAS PARA O GALEGO en Redondela

O Servizo de Normalización Lingüística do Concello de Redondela organiza un acto de presentación do  proxecto VITAMINAS PARA O GALEGO.

Trátase dunha campaña de sensibilización levada adiante por distintos medios como  Galicia Confidencial, Tempos Novos, Praza Pública, Novas da Galiza, Radiofusión, Valminor.info, quepasanacosta, Certo.gl, O Sil e Crónica3, e que apoian tamén Terrachá.xa, Crónicas da comarca (Arzúa – Melide), Radio Nordés (Vimianzo), Cadernos de Comunicación e Análise, Hermes e Atenea, Surfgz.com, Disquecool, Cabozo e Vencello. Todos estes promotores son medios e redes sociais que teñen en común a utilización da lingua galega como lingua de comunicación.

O idioma galego necesita axuda, necesita vitaminas que lle dean forza e o impulsen, sobre todo nos ámbitos sociais e comunicativos. Neste proxecto participan os medios que empregan, prestixian e difunden a nosa lingua, o noso xeito de falar,  e reivindican o feito de que a pluralidade de linguas é unha riqueza cultural que a humanidade debe protexer e cultivar.

Os medios son as VITAMINAS que necesita a nosa lingua para garantir o seu prestixio e o futuro do idioma para as vindeiras xeracións. Para espallar esta idea xorde o proxecto “Vitaminas para o galego“, impulsado por estes medios en galego e que se centrará en eventos que se desenvolverán en distintas vilas galegas, e nun festival que se celebrará en Santiago de Compostela na primavera de 2012.

No acto que se celebrará o vindeiro venres, 20 de xaneiro, ás 19.30 horas, na Casa da Cultura de Redondela,  participarán como relatores: Pedro Telmo (O VAL MIÑOR.INFO), Marcos Pérez (PRAZA PÚBLICA), Henrique Sanfiz (RADIOFUSIÓN), e representantes d’A MESA, PRO-LINGUA e AGAL.
Ademais, como broche de ouro, contarase coa actuación do músico Roi Casal e da cantante Silvia Ferré.

O Servizo de Normalización Lingüística anima a toda a cidadanía a que se achegue e apoie esta iniciativa, e que demande medios en galego para sabermos máis de nós e do mundo que nos rodea.

Inscrición nas probas para a obtención dos CELGA

O Diario Oficial de Galicia publica hoxe (DOG núm. 11, martes, 17 de xaneiro de 2012) a convocatoria de probas para a obtención dos certificados de lingua galega, niveis CELGA 1, 2, 3 e 4, no ano 2012.

Pódense inscribir nas mesmas as persoas maiores de 16 (ou que os cumpran en 2012), logo de pagar as correspondentes taxas de dereitos de exame (15.61 €).

As probas desenvolveranse nas cidades de Santiago de Compostela, A Coruña, Lugo, Ourense e Vigo, nas seguintes datas:

CELGA 4: 2 de xuño de 2012

CELGA 2: 3 de xuño de 2012

CELGA 3: 9 de xuño de 2012

CELGA 1: 10 de xuño de 2012

 O prazo para realizar a inscrición remata o 3 de abril de 2012.

As persoas interesadas poden dirixirse ao Servizo de Normalización Lingüística para solicitar información e o impreso de solicitude.