Dicionario de pronuncia da lingua galega

O Dicionario de pronuncia da lingua galega, do profesor Xosé Luis Regueira (RAG, 2010), desenvolvido dentro dun proxecto da Real Academia Galega e o Instituto da Lingua Galega, xa está agora dispoñible na rede. Esta nova ferramenta en liña permite consultar 60.000 pronuncias do léxico común galego na súa variedade estándar.

O obxectivo principal deste recurso é ofrecer un modelo oral de referencia e de consulta aos profesionais que traballan coa lingua falada (xornalistas, dobradores, profesorado, etc.), e tamén facilitarlles a aprendizaxe ás persoas que estudan galego. As consultas pódense facer en liña a través dun buscador no que poden introducirse palabras ou cadeas de caracteres. A páxina de resultados devolve a forma, a categoría gramatical, a transcrición e o arquivo de voz.

Deste xeito o dicionario en liña contribuirá tamén á normalización da lingua galega, á calidade e ao seu prestixio, pois difunde un modelo de pronuncia estándar para o idioma, útil sobre todo para o seu uso nos medios orais de comunicación e noutros ámbitos de difusión do galego.

Pódese acceder premendo nesta ligazón.

VENCELLO, rede temática de blogs en galego

Xa temos na nosa lingua a primeira rede temática de blogs.

A unión de diversos espazos xa existentes na rede con outros novos creados á mantenta, deu como resultado VENCELLO, que tentan cubrir un amplo abano de temáticas co denominador común de estaren escritos en lingua galega.

O seu nome, VENCELLO (tradicionalmente, cordel co que se amarraban os feixes de palla), foi adaptado aos novos tempos para referirse a un vínculo dun feixe de blogs.

Esta nova rede inclúe blogs con todo tipo de temáticas, dende espazos adicados aos sistemas operativos e as utilidades ou aparatos máis punteiros (Android, Apple, BlackBerry), ata outros de difusión científica, tecnoloxía (Galiloxía), cinema (Cinema Friki) ou videoxogos (Memoria Pixelada). A vontade do proxecto é seguir medrando e engadindo día a día novas temáticas, novos blogs en fase de preparación que se irán ampliando xa nas próximas semanas.

Entre os aspectos máis novidosos desta rede temática atópase A Incubadora, un viveiro de blogs que pretende servir de punto de encontro para xente que desexe escribir sobre algunha temática e queira que lle axuden a poñer un blogue en marcha. Este é un servizo que ofrecen totalmente de balde para que quen queira poida compartir o seu coñecemento ser ter problemas de deseño ou estruturación deses contidos.

O proxecto está aberto á participación, pois ese é un dos seus obxectivos: continuar medrando para ampliar os seus horizontes. Así que aquí temos un novo proxecto aberto agardando a que participemos a través de suxestións, ideas ou colaboracións.

E como non podía ser doutro xeito, tamén está presente nas principais redes sociais: Twitter e Facebook.

Toponimia no seu sitio

Os topónimos son os nomes de lugar, e do seu estudo encárgase a toponimia, ciencia incluída dentro da onomástica (o estudo científico dos nomes propios que busca o sentido, a etimoloxía e a evolución dos nomes, ben sexa de lugar (toponimia), de persoa (antroponimia), de animais (zoonimia) ou doutros obxectos personalizados).

O curioso é que os nomes propios, tal como di a súa propia definición, responden a cousas que teñen un carácter singular, único, tanto que sexan de persoas coma de lugares. E aínda así, atopamos constantemente nomes de lugar deturpados que non fan máis que atacar a súa propia natureza, ben por deformacións erróneas do nome orixinal, ben por traducións a outras linguas.

No caso dos topónimos galegos os erros máis frecuentes son a súa tradución ao castelán, como se os nomes propios tiveran tradución. Así pois debemos rexeitar e denunciar os usos erróneos de nomes como *Sanjenjo, *Villagarcía de Arosa o *Puenteareas, no canto dos seus nomes correctos e oficiais SANXENXO, VILAGARCÍA DE AROUSA OU PONTEAREAS.

A Lei de Normalización Lingüística (Lei 3/1983, do 15 de xuño), establece que a única forma oficial dos nomes dos lugares (topónimos) de Galicia é a galega. Esa determinación dos nomes oficiais correspóndelle á Xunta de Galicia (agás no caso das vías urbanas, que é responsabilidade dos concellos). Nós xa reclamamos dende o SNL a súa correcta utilización e a sinalización conforme á toponimia oficial, e así seguiremos no futuro.

O grupo de especialistas encargado de determinar os nomes oficiais é a Comisión de Toponimia, formada por expertos na materia. Os resultados dese estudo científico deu lugar á publicación, no ano 2003, do Nomenclátor, que determinou a fixación da toponimia oficial,  que é a que se debe utilizar e a única válida para todos os efectos.

No noso país o número de topónimos é altísimo, pola súas particularidades xeográficas, e os topónimos menores constitúen un enorme patrimonio de grande importancia científica e cultural. Por iso, rematada a fixación de todas as entidades de poboación, a Comisión de Toponimia aborda na actualidade a recollida exhaustiva de toda a microtoponimia viva no Proxecto Toponimia de Galicia, proxecto no que tamén imos colaborar dende o Concello de Redondela.

Pódese obter máis información nas seguintes ligazóns, e ante calquera dúbida consultar a Toponimia oficial de Galicia

Toponimia na páxina da SXPL
SITGA (Sistema de Información Territorial de Galicia)

AGON (Asociación Galega de Onomástica)






Aprendendo do mar

As praias galegas contarán neste verán con divulgación sobre as investigacións mariñas.

Os areais de Riazor (A Coruña), Baltar (Sanxenxo) e Samil (Vigo), aproveitando a importante afluencia de turistas e bañistas ás praias, acollerán obradoiros divulgativos nos que se mostrará a gran riqueza do litoral galego cunha campaña de divulgación científica e tecnolóxica mariña a gran escala.

Campus do Mar na praia, que desembarcará dende o venres 12 ata o vindeiro 28 de agosto nos principais areais galegos,  achegará as ciencias mariñas á sociedade dun xeito doado, sinxelo e, sobre todo, divertido. Os obradoiros realizaranse nun posto itinerante de 250 metros cadrados que se instalará nas praias galegas máis multitudinarias durante todo o día:  no areal coruñés de Riazor (12, 13 e 14 de agosto), na praia de Baltar, en Sanxenxo (19, 20 e 21 de agosto), e finalmente no areal vigués de Samil (26, 27 e 28 de agosto).

Unha boa oportunidade para ocupar o noso tempo de lecer aprendendo a observar, comprender e valorar o noso medio mariño, parte importante tamén do noso patrimonio natural.

Ademais, a partir de setembro, o Campus do Mar desenvolverá o CAMPUS DO MAR LIFE, un programa cultural e deportivo que inclúe numerosas actividade lúdicas entre as que atoparás visitas ás embarcacións tradicionais en Bouzas, visita nocturna aos Petróglifos de Outeiro dos Lameiros, excursións en barco pola ría de Vigo (na que historiadores e filólogos do IEM irán explicando os nomes do mar, a talasonimia e o seu significado, pesquerías da ría, naufraxios, caladeiros, marcas dos mariñeiros, etc.); actividades deportivas como bautismo de vela, mergullo ou canoa; visitas guiadas ao porto de Vigo ou obradoiro de tecnoloxías mariñas;  e distintos roteiros mareais, como o da Costa da Vela, no Morrazo, ou o litoral de Vigo.

En breve poderase consultar o CALENDARIO de actividades nesta ligazón.