Probas de coñecemento de lingua galega

A Secretaría Xeral de Política Lingüística anuncia que o prazo para inscribirse nas probas para obter os certificados de lingua galega (CELGA) rematan o vindeiro venres 29 de abril.

O CELGA é o sistema de certificación de lingua galega adaptado ao Marco europeo común de referencia para as linguas. A diferencia de anos anteriores, durante o 2011 só se realizará unha convocatoria destas probas en Galicia, que se celebrará no mes de xuño. Así pois, todas as persoas interesadas deberán formalizar as súas inscricións antes da fin deste mes de abril.

O calendario das probas, que se desenvolverá nas cidades da Coruña, Santiago de Compostela, Lugo, Ourense e Vigo, en fins de semana,  será o seguinte:

CELGA 4: 18 de xuño

CELGA 2: 19 de xuño

CELGA 3: 25 de xuño

CELGA 1: 26 de xuño

A estas probas para a obtención dos certificados oficiais poderán presentarse todas aquelas persoas maiores de 16 anos ou que os cumpran antes de finalizar o ano.

Deberán facer a liquidación das taxas (15.61 €) en calquera entidade financeira, e entregar o xustificante do pagamento xunto á folla de inscrición na Secretaría Xeral de Política Lingüística, segundo o modelo do anexo I da convocatoria.

Pódese ver a convocatoria completa na seguinte ligazón.

III Semana do libro, a festa das palabras

O Servizo de Normalización Lingüística e máis as Bibliotecas públicas de Redondela organizan, por terceiro ano consecutivo, a Semana do libro, a festa das palabras.

A conmemoración, o vindeiro 23 de abril, do día do libro, serve de pretexto para facer esta exposición multilingüe, que se instalará en espazos pouco convencionais (como as alamedas ou a entrada dos multiusos), e que este ano ademais, visitará os centros de ensino de primaria do noso concello cunha biblio-caravana.

Grazas á colaboración das diferentes institucións ás que se solicitaron os libros: Instituto Camðes, Euskararen Donostia Patronatua (Servizo de promoción do éuscaro do Concello de Donostia), Dirección de Promoción do Éuscaro (Goberno Vasco), Secretaría de Política Lingüística (Generalitat de Catalunya), Academia de la Llingua Asturiana, e Academia de L’Aragonés, foi posible expoñer estes materiais multilingües nos diferentes idiomas da Península Ibérica (galego, castelán, portugués, catalán, aranés, éuscaro, asturiano e aragonés). Ademais de dispor tamén da achega de materiais dos fondos da Biblioteca Municipal e da Axencia de Lectura de Chapela.

Pero ademais, este ano contouse coa colaboración de Protección Civil de Redondela (que serve de apoio loxístico desprazando a biblio-caravana duns lugares a outros), e do Ciclo Superior de Educación Infantil do IES de Chapela, que envía o seu alumnado para realizar actividades de contacontos e promoción da lingua galega para os nenos e nenas de ensino infantil dos centros a onde chega a exposición.

Con esta mostra multilingüe xúntanse o obxectivo inicial de celebrar o día do libro, e procurar unha animación efectiva á lectura, co obxectivo transversal e multidisciplinario de mostrar a diversidade cultural e lingüística dos territorios que nos son máis próximos, e facer fincapé na necesidade do respecto e promoción de todas as linguas, por pequena que sexa a súa distribución ou o número de falantes, pois todas elas constitúen e enriquecen o noso patrimonio cultural.

A programación inclúe visitas da biblio-caravana aos centros de primaria redondeláns nas semanas do 11 ao 15, e do 26 ao 29 de abril; exposición nas alamedas de Chapela e Redondela nas mañás dos días 18, e 19 e 20 (respectivamente); unha conferencia sobre o Premio Carballo Calero de investigación 2009 (20 de abril, ás 20.00 h na Casa da Cultura); e unha exposición permanente dos diferentes materiais na entrada do Multiusos da Xunqueira do 3 ao 6 de abril. As persoas que se acheguen á caravana poderán tamén consultar, no tríptico informativo, un pequeno glosario multilingüe que axudará a apreciar as diferencias e semellanzas entre as distintas linguas, coa intención de promover a curiosidade sobre as mesmas e animar a mellorar o seu coñecemento.

PROGRAMACIÓN DOS CENTROS
11 abril: CEIP Quintela
12 abril: CEIP Outeiro das Penas
13 abril: CEIP Porto Cabeiro
14 abril: CEIP de Cedeira
15 abril: CEIP Igrexa – Chapela
26 abril: CEIP Sto. Paio de Abaixo (Reboreda)
27 abril: CEIP Laredo
28 abril: CEIP Alexandre Bóveda
29 abril: CEP Santa Mariña

Máis información no blog das Bibliotecas de Redondela.

Xogando coa lingua, obradoiro infantil nas vacacións

Os nenos e nenas de 4 a 12 anos poderán asistir aos obradoiros XOGANDO COA LINGUA, organizados pola Concellaría de Servizos Sociais e Igualdade en colaboración coa Concellaría de Normalización Lingüística, que se celebrarán nos días laborables da Semana Santa.

O obxectivo desta actividade é favorecer a conciliación da vida laboral das familias durante os períodos de vacacións do curso escolar e, ao mesmo tempo, aproveitar para dinamizar e enriquecer o lecer dos cativos e cativas con recursos en lingua galega.

Este achegamento da lingua galega aos nenos e nenas redondeláns pretende tamén mellorar a súa competencia lingüística, e para iso utilizaranse xogos e diferentes actividades lúdicas. Desenvolverase no Multiusos da Xunqueira de Redondela os días laborables da Semana Santa, é dicir, luns 18, martes 19 e mércores 20 de abril, en horario de 11 a 13 horas.

A ASOCIACIÓN XUVENIL XARUME é a encargada do desenvolvemento desta actividade, na que os monitores utilizarán exclusivamente a lingua galega como lingua vehicular, e na que os/as participantes poderán facer diferentes xogos, actividades musicais, xogos de palabras e elaboración de xoguetes con material reciclado.

Para participar será preciso realizar a inscrición previamente, que será atendida por rigorosa orde de solicitude, no CIM (Centro de Información ás Mulleres), na rúa Isidoro Queimaliños, núm. 2 , ou chamando ao teléfono 986 40 80 43.