Farenheit, no Auditorio da Xunqueira

O Auditorio da Xunqueira acolleu esta mañá unha función teatral para alumnado de ensino secundario, patrocinada pola Concellaría de Normalización Lingüística.

Trátase do espectáculo Verbum FARENHEIT, realizado por Limiar Teatro en colaboración con Verbum, casa das palabras e Ponte nas Ondas,  inspirado na novela de Ray Bradbury Farenheit 451, pero ataviada con textos literarios de autores galegos (Rosalía de Castro, Vicente Risco, Castelao ou Neira Vilas mestúranse con Manuel Antonio, Martín Códax ou Lois Pereiro).

Verbum Farenheit é a historia de dous homes, dous presos que comparten un mesmo delito, ler, nunha sociedade onde a lectura está prohibida e os libros son queimados por bombeiros incendiarios. Os libros están, nesta historia, preservados na clandestinidade alén do mar, na terra dos homes libro.

280 alumnos e alumnas do IES Chapela, IES Illa de San Simón, IES Pedro Floriani e IES Mendiño puideron presenciar esta obra na que se incidiu na liberdade, na necesidade de adquirir coñementos, de ler, e de lembrar os autores literarios como parte esencial da nosa vida e da nosa cultura.

Pódese consultar a unidade didáctica na seguinte ligazón.

Novas ferramentas en galego

A Secretaría Xeral de Política Lingüística e a empresa Microsoft veñen de presentar as versións en galego dos últimos produtos tecnolóxicos: Windows7, Office 2010, Dynamics CRM e Sharepoint.

Estas novas aplicacións son gratuítas e están accesibles na páxina web da SXPL.

Estas ferramentas tecnolóxicas garantirán que a nosa lingua estea presente tamén nos programas de maior uso social e profesional, e facilitarán o desenvolvemento das relacións sociais e laborais en lingua galega.

A campaña denomínase VIVE EN GALEGO, e inclúe sistemas operativos, programas informáticos e outros paquetes ofimáticos de libre descarga.

Pero ademais inclúe un video promocional ben suxerente e reflexivo.

24 de febreiro, día de Rosalía

Tal día coma hoxe, pero en 1837, naceu Rosalía de Castro, a nosa máis grande poetisa.

A mellor forma  de facer que siga viva entre nós é ler a súa obra e continuar a espallala polo mundo. Así que, aínda que todos os días son bos para nos mergullar nas súas composicións, hoxe cómpre dedicarlle especialmente o noso espazo e o noso tempo.

Aproveitamos o traballo feito pola biblioteca do IES San Paio (Tui), lembrando a Rosalía (nai da lingua) e a conmemoración do día da lingua materna.

E tamén os recursos que nos achega a biblioteca do CEIP Alexandre Bóveda, de Chapela.

Día da Lingua Materna

Como vimos facendo nos últimos anos, hoxe lembramos de novo a celebración do Día Internacional da Lingua Materna.

O obxectivo desta celebración,  declarada pola UNESCO en 1999,  é impulsar as linguas maternas en todo o mundo e, maiormente, as das minorías, por seren as que se encontran nunha situación máis difícil. Deste xeito incídese na promoción da diversidade lingüística e cultural, ao tempo que se impulsa o recoñecemento, o uso e a divulgación das linguas maternas, especialmente as das linguas con menos falantes.

O Día Internacional vense celebrando dende febreiro de 2000 para promover a diversidad lingüística e cultural, e impulsar o multilingüismo. Esta data comemora o mesmo día de 1952, cando estudantes que se manifestaban polo recoñecemento da súa lingua,  o Bangla (un dos dous idiomas nacionais da entón Pakistán), foron asasinados a tiros pola policía de Dhaka, a capital do que hoxe é Bangladesh.

Nós temos, como galegos e galegas, o privilexio de termos unha lingua propia, e de vivir nunha comunidade que ten dous idiomas oficiais;  e isto, lonxe de ser unha traba ou un peso, constitúe unha riqueza e unha gran oportunidade.

Termos lingua de noso fornécenos dunha identidade colectiva que une a todos os galegos independentemente de cal sexa o idioma que falan habitualmente. Termos lingua e cultura de noso amplía o noso universo de comunicación e constitúe unha ponte que facilita o acceso a outros idiomas e culturas. É un valor engadido, unha marca que nos singulariza e dá prestixio, que nos sitúa no mundo como colectividade que ten algo máis e distinto para ofrecer. Por iso é tamén unha responsabilidade que os galegos debemos asumir: é a nosa obriga contribuír co galego ao patrimonio cultural da humanidade.

Se mantemos e incorporamos a lingua galega  á comunicación familiar, os nosos fillos ligarán o idioma que nos une coa afectividade do fogar e adquirarán máis doadamente a competencia nel.

A nosa encomenda para este día, e para todos os días do ano,  é facerlles ver aos nosos cativos que nos rodean moitas linguas e que todas son igualmente importantes, pero que a nosa lingua propia é o celme do noso ser como pobo, e o noso xeito de entender o mundo.

PRESENTACIÓN DA SXPL – Lingua_Materna_2011.swf